حروف الكلمة رصاص

حروف الكلمة..
بداها المهدي..
وفي شيكان صداها مدوي..
وسجل سجل ياتاريخ
كلمة شعب لعالمنا معلم..

حروف الكلمة..
شلالا هادر..
في قول الحق..
ابدا ما تهادن..
تقيف وتقابل..
من اجلو تصادم..
وما بتندسا وراء الحيطان..

كلمة حق ..
من شعب معلم..
رافع الراية وما بستسلم..
اسالوا عنو الاستعمار..
لما الازهرى ..
طردو بحروف الكلمة..
ومن خلفوا رجال عشقوا السودان

حروف الكلمة..
رصاص ما بيتقابل..
لابتهادن ولا بتجامل..
ولما الظالم يقيف يتطاول..
بيهدو حرف من كلمة ..
في اكتوبر كانت كلمة..
سهم قاتل رماهو شعب..
..ولدو القرشي..
وفي ابريل ..
كانت كلمة..
لما الطاغية طغي واتجبر
انتفض الشعب
وحطم عرشو فقط بي بكلمة..

ستظل الكلمة..
وحروفا تقاتل..
كل الظلم..
وظلامو الاسود..
كل جبان متسلط ظالم..
بتهدوا الكلمة..
وتضوي الكلمة..
وتضوي ليل الظلم العاتم..

ستظل الكلمة..
وحروفا تناضل..
رافعه الراية...
للحرية..
تهد وتقاتل..
كل متسلط ظالم..
ومابتهادن..
وتكون للكلمة القول الفاصل..
تنير وتضوي ..
ظلام الظلم الداكن.
بالحرية..

حروف الكلمة..
شلالا مدمر..
عالي وهادر..
للظلم محطم..
يشوفا الاعمي..
ويشيلها مكسر..
ويطرب ليها...
ويغنيها كمان الاخرس

الكلمة محال..
ابدا تنزال..
قوية حرة..
ما بتتلجم..
ولا بتكمم..
وفي صدر الظالم..
سهما قاتل..لابنفك ولا بنزال..

ابقوا عشرة..
عليها الكلمة..
نقية وطاهره..
عفيفة شريفة..
قويه وهادرة
من اجل السودان



الكلمة سلاح لكل مظلوم..
ضد الظالم والمستعبد
خلقنا الله ناس احرار
لابننداس
ولابنحني الراس
عزة نفس
وفوقا كرامة..
ومن مساها
تكون الكلمة
سيفنا الباتر
لا للظلم والاستعباد

الكلمة شرف ليهو مراجع
ليها اصول وليها شرائع
قانون رادع
للمتكبر والمتجبر
اساس متين
مدارس الشارع

لكل مظلوم
وكل معارض
وكل مقاوم لليل الظالم
صونوا الكلمة
وادوها مقاما
فالكلمة شريفة عالي مقاما
وهي حقيقة وهي امانة
مبادئ ثابتة مابتتبدل ولابتتغير
اساسا تراثنا
وقيمنا الراسخة
وتوبا فضيلة
من زمن اجدادنا..
حقائق ثابتة
قواعد راسخه
ماها مهينة ولابتعرف اهانه
ولاعرقيه
لاجهويه
ولاحزبية
وطن واحد
ونيلوا الخالد
وشعب واحد
شعب علم كل العالم
معني الكلمة
والحرية

تعالوا اجتمعوا..
من اجل الكلمة
تعال نتفاكر
نقعد نتشاور
في ضل لالوبة
او تحت راكوبة
مادايرين لينا فنادق
ولااكل بشوكة معاها معالق
تعالوا برانا والله معانا
ومافي غريب يقعد بيناتنا
نحن برانا نشيل الشيلة
ونحل المشكلة كده بيناتنا
بدون عرقية
ولاجهويه
ولاحزبية
ونحن ابناء عزة ومهيره
نقول يارب ان شاء الله عديلة
ويكون مرجعنا اساسو
ميثاق الكلمة
وشرف الكلمة
اصولوا ثابته عالية وخافقه
وتاريخ شعبا عشق الكلمة
كل مشكلة نشوف اسبابا
وكيف تنحل وكيف تتداوي
نصفي نفوسنا
من كل ضغينه
ونختار الصالح
بدون مصالح
ليكون حادينا
ونرتب بيتنا
بدون تبعية
ولاجهوية
نبني بلدنا
ونقول يالله
تحفظوا لينا
يعلي مقاموا
ويحمي ترابو
ونحن جنودو
من كل ظالم وكل مستعمر

وصية اخيرة..
ابقوا عشرة..
عليها الكلمة..
نقية وطاهره..
عفيفة شريفة..
قويه وهادرة
من اجل بلدنا
بلد واحد
ونيلو الخالد
شعب واحد
بلا تبعية
ولاعرقية
ولاجهوية
ولاحزبية
شعب علم كل العالم
معني الحرية